کراچی : ایم کیوایم کے رہنما اور سندھ اسمبلی میں اپوزیشن لیڈر خواجہ اظہارالحسن نے کہا ہے کہ وزیر اعظم کو مکھی کے مرنے کا تو دکھ ہے انسانوں کے مرنے کا دکھ نہیں ہے،اتنے بڑے منصب پر بیٹھ کر اس طرح کا مذاق نہیں کرنا چاہیئے۔
ان خیالات کا اظہار انہوں نے سندھ اسمبلی بلڈنگ میں نیوز کانفرنس کرتے ہوئے وزیر اعظم نواز شریف کے حالیہ بیان پر اپنے ردعمل میں کیا۔
خواجہ اظہار الحسن نے کہا کہ شہر قائد میں جاں بحق ہونے والوں کو مکھی سے تشبیہہ دینا وزیراعظم کے شایان شان نہیں ہے ۔
تھر میں لوگ بھوک اور کراچی میں پیاس سے مر رہے ہیں۔ سندھ حکومت کے ساتھ دما دم مست قلندر کی تیاریاں کر رہے ہیں۔
خواجہ اظہار الحسن نے کہا کہ جمہوریت کے نام پر سندھ کی عوام کو یرغمال بنا لیا گیا ہے۔ ایک سوال کے جواب میں خواجہ اظہار الحسن نے حکومت کی بجٹ پالیسی کو شدید تنقید کا نشانہ بناتے ہوئے کہا کہ سندھ حکومت نے بجٹ میں سندھ کے شہری علاقوں کو نظر انداز کیا۔
ترقیاتی بجٹ میں 32ارب کی کمی کی گئی ہے جو سندھ کی عوام کے ساتھ زیادتی ہے۔ خواجہ اظہار الحسن نے بیوروکریسی کو متنبہ کرتے ہوئے کہا کہ اگر افسران نے اپنا قبلہ درست نہ کیا تو پھر انہیں نیب اور عدالتوں کے چکر لگانے پڑیں گے۔
