احمد آباد: بھارتی وزیراعظم نریندرمودی امریکی صدراوبامہ سے ملاقات کے وقت جو لباس زیب تن کیا تھا اسے فروخت کے لئے پیش کردیا ہے، لباس کی خاصیت یہ ہے کہ اس کی دھاریوں میں مودی کا نام لکھا ہے۔
ذرائو کا کہنا ہے کہ بدھ کے روز وزیراعظم کا لباس نیلامی کے لئے پیش کیا جائے گا نیلامی کا مقصد گنگا کی صفائی کے لئے پسے جمع کرنا ہے۔
لباس کی دھاریوں میں ان کا مکمل نام ’’نریندر دامودراس مودی‘‘ باریک حرفوں میں لکھا ہواتھا۔ ان کا یہ لباس دنیا بھرکی خبروں کی زینت بنا تھا۔
نمائش کے آرگنائزرز کا کہنا ہے کہ سوٹ کے ساتھ مزید 450 تحائف بھی نیلام کیے جائیں گے اور یہ نیلامی سورت میں وزیراعظم کی رہائش گاہ پرتین دن تک جاری رہے گی۔
بھارتی وزیراعظم کا ماننا ہے کہ مقدس دریا کا آلودہ ہونا پوری قوم کے لئے شرمندگی کا مقام ہے لہذا نیلامی سے حاصل ہونے والی رقم گنگا کی صفائی میں خرچ کی جائے گی۔
یہ پہلا موقع نہیں ہے کہ جب مودی نے اپنے تحائف نیلام کیے ہوں اس سے قبل جب گجرات کے وزیراعلیٰ تھے تب انہوں نے لڑکیوں کی تعلیم کے لئے اپنے 18 ہزار کے لگ بھگ تحائف نیلام کرکے تقریباً تیس لاکھ روپے اکھٹے کیے تھے۔
ذرائع کا کہنا ہے کہ سورت سے تعلق رکھنے والے بزنس مین نے ایک کروڑ 21 لاکھ روپے کی بولی لگا دی ہے۔
دوسری جانب کانگریس کا کہنا ہے کہ نیلامی کا گنگا سے کوئی تعلق نہیں بلکہ لاکھوں کا سوت پہنے سے مودی کی پبلک امیج کو پہنچنے والے نقصان کو درست کرنے کی کوشش کی جارہی ہے۔
