کراچی : جمعیت علمائے پاکستان نورانی گروپ نے این اے246 کے ضمنی الیکشن میں پاکستان تحریک انصاف کی بھرپور حمایت کا اعلان کیا ہے ۔
کراچی میں جے یو پی کے سربراہ اویس شاہ نورانی کی رہائش گاہ پر پی ٹی آئی رہنما اور ضمنی انتخاب کے امیدوار عمران اسماعیل نے ملاقات کی۔
بعد ازاں مشترکہ پریس کانفرنس میں عمران اسماعیل کاکہنا تھا کہ گذشتہ روز عمران خان نے اویس شاہ نورانی سے ٹیلی فونک رابطہ کیا تھا جس میں انہوں نے کہاکہ وہ شاہ احمد نورانی کے عقیدت مند ہیں اور ان کا شمار جید علماء اور سیاستدانوں میں ہوتا ہے۔
عمران اسماعیل نے کہاکہ وہ جے یو پی کے مشکو ر ہیں کہ انہوں نے ضمنی انتخاب میں پاکستان تحریک انصاف کی حمایت کا فیصلہ کیا ۔
عمران اسماعیل کاکہنا تھا کہ نہ صرف ضمنی انتخابات بلکہ آئندہ بھی ایک دوسرے کی حمایت جاری رکھی جائے گی ،اس موقع پر شاہ اویس نورانی کاکہنا تھا کہ ملکی تاریخ میں 2013 کے انتخابات میں بدترین دھاندلی ہوئی ،2013 میں ایسا الیکشن ہوا جس کے نہ سر تھے اور نہ پیر۔
اس الیکشن کے بعد کوئی تبدیلی نہیں آئی،ٹھپہ مافیا نے جے یو پی، پی ٹی آئی اور محب وطن جماعتوں کے کارکنوں کو زدوکوب کیا، انہوں نے کہا کہ 26 سالوں سے کراچی اندھیرے میں ڈوبا ہوا ہے۔
کراچی کے لوگوں کا ان سے مینڈٹ چھین لیا گیا ہے ، انہوں نے کہا کہ ضمنی الیکشن میں تحریک انصاف کا بھرپور ساتھ دیں گے۔
جے یو پی کے کارکنان اور عہدیدار 23 اپریل کو بھرپور طریقے سے پی ٹی آئی کو ووٹ ڈالیں، شاہ اویس نورانی کاکہنا تھا کہ ابھی تک پی ٹی آئی میں کوئی مسلح ونگ نظر نہیں آیا، پی ٹی آئی نظریاتی جماعت ہے ۔
