پیپلز پارٹی پنجاب کے صدر منظور وٹو نے کہا ہے کہ اے پی سی کے فیصلوں پر عمل درآمد نہ کرنا حکومت کی نااہلی ہے۔
لاہور میں میڈیا سے گفتگو کرتے ہوئے میاں منظور وٹو کا کہنا تھا کہ آل پارٹیز کانفرنس میں پیپلز پارٹی سمیت تمام جماعتوں نے حکومت کو دہشتگردوں سے مذاکرات اور آپریشن کا اختیار دیا تھا لیکن حکومت کبھی مولانا فضل الرحمٰن اور مولانا سمیع الحق کی منت کرتی ہے تو کبھی عمران خان سے مذاکرات کیلئے کہتی ہے۔
انہوں نے کہا کہ ملک مزید کسی تاخیر کا متحمل نہیں ہو سکتا، اگر طالبان بات نہیں مان رہے تو حکومت کو آپریشن سے کس نے روکا ہے، منظور وٹو کا کہنا تھا کہ ملک میں دہشتگردی کیخلاف واحد جرآت مندانہ آواز بلاول بھٹو زرداری کی ہے، جو دہشتگردی کیخلاف رائے عامہ ہموار کرنے کا عزم رکھتے ہیں۔
