کراچی : گذشتہ روزکراچی کے علاقے لیاری میں صوبائی وزیر جاوید ناگوری کے ڈیرے پر دہشت گردوں کے حملے میں جاں بحق ہونے والے جاوید ناگوری کے بھائی اکبر ناگوری کو سپرد خاک کردیا گیا۔
اکبر ناگوری کی نماز جنازہ عید گاہ مسجد شاہ ولی اللہ روڈ میں ادا کی گئی، جس میں مقتول کے بھائی پیپلزپارٹی کے رہنما جاوید ناگوری، نجمی عالم،وقار مہدی سمیت دیگر رہنماؤں سمیت کارکنان اور عوام الناس کی بڑی تعدا د نے شرکت کی۔
مقتول اکبر ناگوری کو میراپیر قبرستان میں آہوں اور سسکیوں میں سپردخاک کردیا گیا، پیپلزپارٹی کے رہنماؤں نے جاوید ناگوری پر حملے اور اکبر ناگوری کے قتل پر گہرے دکھ کا اظہار کیاہے۔
دوسری جانب تفتیشی ذرائع سے ملنے والی اطلاعات کے مطابق جاوید ناگوری کے ڈیرے پر حملے میں ملوث ملزمان کے حوالے سے کافی شواہد مل چکے ہیں جلد ملزمان کو گرفتار کرلیا جائے گا۔
واضح رہے کہ لیاری میں صوبائی وزیرجاوید ناگوری کے دفتر پر دستی بم حملے کے بعد اندھا دھند فائرنگ بھی کی گئی۔
پولیس حکام کے مطابق فائرنگ کے نتیجے میں صوبائی وزیر کے بھائی اکبر ناگوری ،سمیت چھ افراد زخمی ہوگئے۔ زخمیوں کو اسپتال منتقل کیاگیا جہاں اکبر ناگوری دم توڑ گئے۔
وزیراعلیٰ سندھ سید قائم علی شاہ نے حملے کی شدید مذمت کی ہے۔ انہوں نے آئی جی سندھ سے واقعے کی رپورٹ طلب کرلی ہے۔
