اسلام آباد : وزیراعظم نواز شریف کی زیرصدارت پارلیمانی رہنماؤں کا اجلاس منعقد ہوا جس میں جوڈیشل کمیشن کی تشکیل کا معاملہ زیر غور آیا، اس موقع پر ایم کیو ایم کے علاوہ تمام سیاسی جماعتوں نے جوڈیشل کمیشن کے قیام پراتفاق رائے کا اظہار کیا۔
تفصیلات کے مطابق اسلام آباد میں وزیر اعظم میں نواز شریف کی زیرصدارت اجلاس میں جوڈیشل کمیشن کی تشکیل پر اتفاق رائے ہوگیا ہے،اجلاس میں کمیشن کے قیام کے معاملے پر ایم کیوایم کے سوا تمام جماعتوں نے حمایت کردی۔
ایم کیو ایم کے رہنما ڈاکٹر فاروق ستار کا کہنا ہے کہ جوڈیشل کمیشن کی تشکیل آرٹیکل دوسو پچیس اورآرٹیکل ایک سو نواسی کی خلاف ورزی ہوگی۔
متحدہ قومی موومنٹ نے جوڈیشل کمیشن کے قیام کی مخالفت کرتے ہوئے کہا کہ کوئی بھی اہم قانون سازی آئین سے متصادم نہیں ہو سکتی۔
وزیراعظم کا کہنا تھا کہ تحریک انصاف کا جوڈیشل کمیشن کے قیام پراتفاق خوش آئند ہے،بات چیت سے سیاسی جماعتوں میں غلط فہمیاں دور کرنا چاہتے ہیں۔
