ننکانہ صاحب : قومی اسمبلی کے حلقہ این اےایک سو سینتیس کے انتخابات میں مسلم لیگ نواز نے معرکہ مار لیا،تفصیلات کے مطابق مسلم لیگ نواز کی ڈاکٹر شذرہ منصب نے ستتر ہزار آٹھ سو نوے ووٹ لے کر کامیابی حاصل کی۔
حلقہ این اے ایک سو سینتیس کے غیر سرکاری غیر حتمی نتائج کے مطابق ملسم لیگ ن کی امیدوار کے مد مقابل تحریک انصاف کے حمایت یافتہ آزاد امیدوار بریگیڈیئر ریٹائرڈ اعجاز شاہ انتالیس ہزار چھ سو پینتیس ووٹ لے کر دوسرے نمبر پر رہے۔
لاہور میں دو چرچوں میں خودکش حملوں کے بعد اس حلقہ میں ینگسن آباد اور مارٹر پور کے مسیحی برادری کے پولنگ اسٹیشنز پر احتجاجا پولنگ بند کردی گئی۔
مظاہرین نے ٹائر جلائے اور ننکانہ شاہ پور روڈ ٹریفک کے لئے بند کردی، ایک دو پولنگ اسٹیشن پر ہنگامہ آرائی بھی ہوئی جس سے آزاد امیدوار کے دو حامی زخمی ہوگئے۔
غیر سرکاری نتائج کے مطابق نو منتخب رکن قومی اسمبلی ڈاکٹر شذرہ منصب علی نے لاہور میں خود کش دھماکوں کے بعد جیت کا جشن ملتوی کرنے کا اعلان کیا۔
ڈاکٹر شذرہ منصب علی کےاعلان کے باوجود ان کے حامیوں نے جیت کی خوشی میں شہرکے مختلف علاقوں میں وقفے وقفے سے فائرنگ کی، شذرہ منصب علی نے ووٹرز کا شکریہ ادا کیا اور کہا کہ وہ ان کے معیار پر پورا اترنے کی کوشش کریں گی۔
