لاہور: رانا مشہود سےوزارت قانون پنجاب کاقلمدان واپس لے لیاگیا۔ اے آروائی نیوز کے پروگرام کھرا سچ میں رانا مشہودسے متعلق اہم انکشافات کئے گئے تھے۔وزیراعلیٰ شہبازشریف نےپنجاب کابینہ میں بڑے پیمانے پر ردوبدل کا فیصلہ کرلیا ہے ۔
پہلے مرحلےمیں وزیر قانون کاچارج رانا مشہوداحمدخان سے لے کر وزیرخزانہ میاں مجتبیٰ شجاع اُلرحمن کو دے دیا گیا ہے رانامشہود کی تبدیلی کو اے آروائی کے پروگرام کھرا سچ میں اُن کاویڈیو اسکینڈل سامنے آنے کے تناظر میں دیکھاجارہا ہے۔جس میں وہ ایک شخص عاصم ملک سے ایک بڑی رقم کا چیک وصول کرتے نظر آرہے ہیں۔
ایک دوسری ویڈیو میں رانا مشہود جعلی پولیس مقابلوں کا اعتراف بھی کرتے نظر آتے ہیں، رانامشہود کو وزارت سے ہٹائےجانے کے فیصلے کی خبر بھی چند روز قبل اے آروائی ہی نے سب سے پہلے نشر کی تھی۔
ذرائع کے مطابق وزیراعلٰیٰ پنجاب شہباز شریف نے اپنے پاس موجود وزارت داخلہ کا قلمدان وزیر ماحولیات کرنل ریٹائرڈ شجاع خانزادہ کودے دیا، ذرائع کا کہنا ہے کہ آئندہ ایک ہفتے میں خوشاب، بوریوالہ اوررحیم یارخان سے تعلق رکھنے والے وزراء سے قلمدان واپس لیے جانے کا امکان ہے۔
علاوہ ازیں لیگی رہنماء زعیم قادری، عائشہ غوث اور رانا ارشد سمیت نئے ارکان کی کابینہ میں شمولیت متوقع ہے۔
