کراچی : این اےدوسو چھیالیس کے ضمنی الیکشن کی صورتحال مزید کشیدہ ہوگئی، انتخاب سے زیادہ انتخابی مہم خطرناک ہوتی جا رہی ہے ۔
امیر جماعت اسلامی سراج الحق نے کہا ہے کہ ریلی پر حملہ کرنےوالوں نے بہت بڑاظلم کیا،اس کا بدلہ ضرورلیں گے، این اے دو سو چھیالیس کامحاذ کل کے بعد سے مزید گرم ہوگیا ۔
ضمنی معرکے کی مہم بل بورڈز انتخابی کیمپ اور پوسٹرز سے نکل کر ہاتھا پائی تک جا پہنچی ہے، گزشتہ روز لیاقت آباد میں جماعت اسلامی کی ریلی پر نا معلوم افراد نے حملہ کر کے کئی کارکنان زخمی اور گاڑیوں کے شیشے توڑ ڈالے تھے۔
جس کا الزام جماعت اسلامی نے ایم کیو ایم کے کارکنان پر لگایا۔ واقعہ اُس وقت پیش آیا جب ترازو والے پتنگ والوں کے کیمپ کے آگے سے گزر رہے تھے۔
ایم کیو ایم کے رہنما قمر منصور نےالزام لگایا ہے کہ پہل دوسری طرف سے ہوئی تھی ، کراچی کے ضمنی انتخابات میں جناح گراؤنڈ سے شروع ہونے والی کشیدگی کریم آباد پر پی ٹی آئی کے کیمپ تک جا پہنچی تھی، ریلی پر حملے نے انتخاب سے زیادہ مہم خطرناک بنا دی۔
