کراچی: نیلوفر کی طرح اشوبھا بھی پاکستان سے دور دور رہے گا، بحیرہ عرب میں اٹھنے والے طوفان کی رفتار پندرہ ناٹیکل میل فی گھنٹہ ہے، اشوبھا کراچی کے جنوب میں پانچ سو پچاس کلو میٹر دوری پر ہے، طوفان جمعرات کو اومان سے ٹکرائے گا۔
کراچی میں طوفان کے اثرات نظرآنے لگے، ابراہیم حیدری کی جیٹی ڈوب گئی، سندھ اور بلوچستان کی ساحلی پٹی پر بارش کا امکان ہے۔
ڈی جی پی ڈی ایم اے سندھ سید سلیمان شاہ نے پاکستان کو طوفان سے محفوظ قرار دے دیا، انکا کہنا ہے کہ اشوبھا کراچی سمیت سندھ اور بلوچستان میں بارش لائے گا، سمندر میں لہریں اونچی ہیں۔ ابراہیم حیدری میں جیٹی زیر آب آ چکی ہے۔ ابراہیم حیدری اور ریڑھی گوٹھ کے نشیبی علاقے زیر آب آنے کا خدشہ ہے۔ زیادہ منہ زور لہریں ہونے پر ریڑھی گوٹھ کا ڈبلا محلہ ڈوب سکتا ہے۔
اشوبھا کی وجہ سے طوفانی لہروں سے بچنے کیلئے ماہی گیروں سے کہہ دیا گیا ہے، کہ وہ شکار پر نہ جائیں، لوگوں کو کراچی کے ساحل پر سمندر کی موجوں کا مزہ لینے کی اجازت بھی نہیں۔
