جنوبی کیرولینا: سفید فام پولیس اہلکار کے ہاتھوں ایک اور سیاہ فام شخص کے قتل نے امریکہ میں ایک نیا تنازعہ کھڑا کر دیا ہے۔
امریکہ کے شہر فرگوسن میں سفید فام پولیس اہلکار کے ہاتھوں اٹھارہ سالہ سیاہ فام لڑکے مائیکل براؤن کے قتل کے زخم بھی بھر نہ پائے تھے کہ جنوبی کیرولینا میں پچاس سالہ شخص والٹر سکاٹ کو سفید فام پولیس اہلکار مائیکل سلیگر کے ہاتھوں قتل ہوتے کی فوٹیج سامنے آگئی۔
اس واقعے نے ایک بار پھر امریکہ میں نسلی تعصب کی آگ کو بھڑکا دیا ہے، والٹر سکاٹ قتل کے بعد پولیس رپورٹ میں جھوٹ بولا گیا کہ سیاہ فام شخص نے پولیس اہلکار سے ہاتھا پائی کی اور ہتھیار چھیننے کی کوشش کی تاہم سڑک پر موجود ایک اور شخص لیسٹر ہالٹ نے اپنے موبائل پر بنائی گئی فوٹیج عام کرکے پولیس کے جھوٹ کا بھانڈا پھوڑ دیا۔
موبائل فوٹیج سامنے آنے کے بعد پولیس اہلکار سلیگر کو نوکری سے برخواست کرکے قتل کا مقدمہ درج کر لیا گیا ہے تاہم اس واقعہ کے بعد امریکہ کی سیاہ فام کمیونٹی شدید غم و غصہ کا شکار ہے اور پولیس اہلکار کو سزائے موت دینے کا مطالبہ کر رہی ہے۔
دوسری جانب امریکی میڈیا پر اس واقعہ پر بھرپور قسم کی بحث جاری ہے اور ماضی میں پولیس کے ہاتھوں ہلاک کئے جانے والے سیاہ فام افراد کی ہلاکت پر بھی سوالات اٹھائے جارہے ہیں۔
