لاہور ہائیکورٹ بار نے تحریک انصاف کے چیئرمین کی طرف سے لگائے گئے الزامات کو بے بنیاد قرار دیتے ہوئے عمران خان کے الزامات کیخلاف قرار داد منظور کر لی اور یکم ستمبر کو ہڑتال کا اعلان کیا ہے۔
تفصیلات کے مطابق لاہور ہائیکورٹ بار کے اجلاس سے خطاب کرتے ہوئے بار کے صدر شفقت محمود چوہان نے کہا کہ چند دن پہلے ان کی رہائش گاہ پر ڈکیتی کی واردات ہوئی جس کے دوران ڈاکو ان کی بیٹی کی شادی کیلئے تیارکردہ قیمتی زیورات، سامان اور نقدی لے گئے، اس واردات پر عمران خان نے ان پر الزام لگایا کہ انہوں نے اڑھائی کروڑ روپے حکومت سے لئے ہیں جو سراسر جھوٹ اور بے بنیاد ہے۔
صدر ہائیکورٹ بار نے کہا کہ عمران خان نے ہمیشہ کی طرح ان پر بغیر تصدیق کے جھوٹا الزام لگایا اور عوام کی نظر میں اپنا قد مزید چھوٹا کیا، انہوں نے کہا کہ جھوٹا الزام لگانے پر وہ عمران خان کیخلاف قانونی کارروائی کا حق محفوظ رکھتے ہیں ۔
شفقت چوہان ایڈووکیٹ نے کہا کہ وکلاء تنظیموں کا مقصد صرف اور صرف قانون کی بالادستی ہے ،بار ایسوسی ایشن کا کسی سیاسی جماعت سے تعلق نہیں ہوتا مگر عمران خان جھوٹا الزام لگانے سے قبل بنیادی باتیں بھول گئے ۔اجلاس نے عمران خان کے صدر ہائیکورٹ بار پر الزامات کیخلاف قرار داد منظور کرتے ہوئے یکم ستمبر کو ہڑتال کا اعلان کردیا۔
