لاہور :قومی کرکٹ ٹیم کے غیر ملکی کوچز لاہور پہنچ گئے، تفصیلات کے مطابق پاکستان کرکٹ ٹیم کے غیر ملکی بیٹنگ اور فیلڈنگ کوچز لاہور پہنچ گئے ہیں۔ دورہ سری لنکا کیلئے قومی ٹیم کا تربیتی کیمپ جمعے سے شروع ہوگا۔ پاکستان کرکٹ بورڈ نے زمبابوے کے سابق ال راؤنڈر گرانٹ فلاور کو بیٹنگ اور جنوبی افریقہ کے گرانٹ لوڈن کو فیلڈنگ کوچ مقرر کیا تھا۔ دونوں غیر ملکی کوچز لاہور پہنچ گئے اور وہ جمعے سے دورہ سری لنکا کیلئے لگائے جانے والے ٹریننگ کیمپ کو جوائن کرلیں گے۔
ٹریننگ کیمپ چھبیس جولائی تک جاری رہے گا جس میں کھلاڑی مختلف ٹریننگ سیشنز میں حصہ لیں گے جن میں نیشنل کرکٹ اکیڈمی میں ہونے والی جم ٹریننگ کے ساتھ ساتھ سوئمنگ اور فزیکل فٹنس کے سیشنز شامل ہوں گے۔ کیمپ کی نگرانی ہیڈ کوچ وقار یونس کریں گے۔ قومی کرکٹ ٹیم دو ٹیسٹ اور تین ون ڈے کی سیریز کھیلنے کے لئے دو اگست کو سری لنکا روانہ ہوگی جہاں دونوں ٹیموں کے درمیان پہلا ٹیسٹ میچ چھ اگست سے گال میں شروع ہوگا۔
