اسلام آباد: وزیرِاعظم نواز شریف ایک روزہ دورے پر ترکی روانہ ہوگئے، وزیرِاعظم ترک صدر سے یمن اور مشرق وسطیٰ کی صورت حال پر تبادلہ خیال کریں گے۔
یمن کی صورتحال سے متعلق وزیرِاعظم نوازشریف مسلم ممالک کے ساتھ رابطوں کا آغاز کر رہے ہیں، اس سلسلے میں وہ آج ترکی کیلئے روانہ ہوئے۔
جہاں وزیرِاعظم ترک صدر طیب ارگان اور وزیرِاعظم سے ملاقات کریں گے، ملاقات میں یمن کی صورت حال، مشرق وسطیٰ میں امن و امان اور امت مسلمہ کے اتحاد پر تبادلہ خیال کیا جائیگا۔
وزیراعظم مشرق وسطیٰ کی صورتحال پر ترک قیادت سے تفصیلی تبادلہ خیال کریں گے، ملاقات میں او آئی سی کے کردار کو فعال بنانے اور مسلم ممالک کے درمیان تنازعات کے خاتمے کی حکمت عملی پر غور ہوگا۔
حکومتی ذرائع کے مطابق وزیراعظم اور ترک قیادت یمن کی صورتحال سے خطے میں پیدا ہونے والی کشیدگی کے خاتمے کے لیے موثر کرادر ادا کرنے کیلئے صلاح مشورہ کریں گے۔
گزشتہ روز یمن کی صورتحال پر پارلیمنٹ کا مشترکہ اجلاس پیر کو طلب کرلیا گیا، عمران خان اور اسفند یار کے یمن میں فوج بھیجنے پر تحفظات کا اظہار کیا۔
یمن کی صورتحال پر پارلیمنٹ کا مشترکہ اجلاس بلانے کا فیصلہ وزیرِاعظم کی زیرِصدارت اجلاس میں کیا گیا، وزیرِدفاع خواجہ آصف اور مشیرخارجہ سرتاج عزیز نے دورہ سعودی عرب اور سعودی حکام سے ملاقاتوں کے بارے میں اجلاس کو بتایا۔
ذرائع کے مطابق اجلاس میں سعودی عرب کی درخواست پر پاک فوج کے دستے بھیجنے اور یمن سے پاکستانیوں کے محفوظ انخلاء کے بارے میں بھی غور کیا گیا۔
اس سے قبل وزیرِاعظم نواز شریف نے یمن کی صورتحال پر دوست ممالک کو اعتماد میں لینے کا فیصلہ کیا ہے۔
