اسلام آباد: وفاقی وزیرتجارت انجینئر خرم دستگیر خان نے کہا ہے کہ وسطی ایشیاء سے تجارت کیلئے افغانستان سے ڈیوٹی گارنٹی اور برآمدات کے وزن پر عائد اضافی ڈیوٹی کے اختتام پربات چیت جاری ہے۔
ایک بیان میں انہوں نے کہا پاکستان بھی افغان تاجروں کوٹرانزٹ ٹریڈ کی مد میں متوازی سہولیات فراہم کرے گا ،ان تجارتی سہولیات کے نتیجے میں دونوں ممالک میں اعتماد کی فضا میں اضافہ ہوگا اورتجارت بڑھے گی۔
وفاقی وزیر نے کہا کہ پاکستان، افغانستان، تاجکستان ٹرانزٹ ٹریڈ ایگریمنٹ بہت جلد متوقع ہے جس کی بدولت پاکستان کیلئے وسطی ایشیاء کی وسیع منڈیوں سے نزدیک ترین زمینی راستہ کے ذریعے تجارت ممکن ہوجائے گی جس کے پاکستان کی تجارت پر دور رس اثرات مرتب ہوں گے۔
انھوں نے کہا کہ خطے میں مشترکہ تجارتی اورٹرانسپورٹ کاریڈور کا قیام عمل میں لائیں گے جس کے ذریعے خطے کی تجارت دنیا کے ترقی یافتہ خطوں کی طرح تیزاورباسہولت ہوگی۔
