ایمسٹرڈیم: ہالینڈ میں انتہا پسند عناصر نے ایک زیر تعمیر مسجد کو آگ لگادی جس نے قریبی عمارات کو بھی اپنی لپیٹ میں لے لیا واقعے سے علاقے میں کشیدگی پھیل گئی۔
تفصیلات کے مطابق ہالینڈ کے علاقے کیولم برگ میں موجود اسلامک سینٹر کی عمارت کو نامعلوم شرپسندوں نے آگ لگادی، آگ اس قدر شدید تھی کی اس نے دیکھتے ہی دیکھتے قریبی عمارتوں کو بھی اپنی لپیٹ میں لے لیا تاہم کسی جانی نقصان کی اطلاع نہیں ملی۔غیر ملکی خبر رساں ادارے کے مطابق آگ کی شدت اتنی تھی کہ اس کے شعلے میلوں دور تک دکھائی دیے، اسلامی مرکز میں موجود افراد کونکال لیا گیا۔
انتظامیہ نے کہا کہ آگ نے قریبی عمارت کو بھی لپیٹ میں لیا، واقعے کے بعد فائر بریگیڈ کی گاڑیاں جائے وقوع پہنچیں اور فوری آگ بجھائی، آگ کے سبب دو قریبی عمارتوں کو بھی نقصان پہنچا۔
مقامی حکام کے مطابق اسلامک سینٹر کی یہ عمارت ایک اسلامک تنظیم نے مسجد کے قیام کے لیے خریدی تھی جس کا تعمیری کام جاری تھا۔
پولیس کا کہنا ہے کہ آگ کچھ شرپسندوں نے جان بوجھ کر لگائی تاہم ابھی تک واقعے کی ذمہ داری کسی نے قبول کی نہ ہی کوئی گرفتاری عمل میں آئی، آگ لگانے والے شرپسندوں کی شناخت اور گرفتاری کے لیے کوششیں جاری ہیں۔
