لاہور: ٹیکسٹائل ملزمالکان بھی توانائی بحران کیخلاف میدان میں آ گئے، اپٹما نے گیس اور بجلی کی لوڈشیڈنگ کیخلاف عید کے بعد بھرپور احتجاج کا اعلان کردیا۔
تفصیلات کے مطابق چیئرمین اپٹما ایس ایم تنویر نے لاہور میں پریس کانفرنس سے خطاب کرتے ہوئے کہا کہ بجلی اور گیس کی بندش کیخلاف عید کے بعد بھرپور احتجاج کیا جائے گا۔
ان کا کہنا تھا کہ عید کے 3 دن ٹیکسٹائل ملز کی بجلی مکمل بند جبکہ 6 اکتوبر سے 10 دن کیلئے گیس بھی بند کردی گئی ہے۔ انہوں نے کہا کہ 4 دن پہلے عدالت نے قانون کے مطابق بجلی کی لوڈشیڈنگ کا حکم دیا لیکن حکومت نے احکامات نہیں مانے۔
چیئرمین اپٹما نے بتایا کہ توانائی بحران سے 9 ماہ کے دوران ٹیکسٹائل انڈسٹری کی 30 سے 35 فیصد پیداواری صلاحیت ختم ہو گئی جبکہ ٹیکسٹائل برآمدات 1ارب ڈالر کم اور 30 لاکھ افراد بیروزگار ہوئے۔
ایس ایم تنویر کا کہنا تھا لگتا ہے حکومت کی ترجیح انڈسٹری نہیں، کچھ اور ہے، یہی حالات رہے تو بیروزگاری بڑھ جائے گی۔
