ملتان: ویسٹ انڈیز کے خلاف ڈیبیو کرنے والے پاکستانی فاسٹ بالر کاشف علی ٹیسٹ میں ڈیبیو کو بڑی کامیابی قرار دیدیا۔
ملتان ٹیسٹ سیریز کے دوسرے میچ میں ویسٹ انڈیز کے خلاف ڈیبیو کرنے والے پاکستانی فاسٹ بالر کاشف علی نے کہا کہ میں شاید اپنی ننھی بیٹی کی دعا کی وجہ سے ڈیبیو کرنے جارہا ہوں، ٹیسٹ کرکٹ کھیلنے جارہا ہوں، میرے لیے یہ بہت بڑی کامیابی ہے۔
دوسرا ٹیسٹ: ویسٹ انڈیز پہلی اننگ میں 163 رنز بنا کر آؤٹ
فاسٹ بالر کا کہنا تھا کہ اس سب کے پیچھے انتھک محنت اور والدین کی دعائیں ہیں، میں انڈر 13، انڈر 16 اور انڈر 19کی کرکٹ نہیں کھیلا، کالج گیا تو پتہ چلا کلب کرکٹ بھی ہوتی ہے۔
کاشف علی نے کہا کہ بہت سی مشکلات آئیں اس وقت میں نے سوچا کچھ اور کرنا چاہیے، میں نے گاؤں سے کرکٹ کھیلنا شروع کی تھی، میری کرکٹ کا سفر 2016 سے شروع ہوا۔
فاسٹ بالر کاشف علی نے مزید کہا کہ شعیب اختر کو دیکھا تو دل میں کرکٹ کھیلنے کا شوق پیدا ہوا، میرے آئیڈل محمدآصف اور جمیز اینڈرسن ہیں، ایسی کوشش کروں گا جس سے ٹیم کو فائدہ ہو۔
واضح رہے کہ دائیں ہاتھ کے فاسٹ بالر کاشف علی کو فاسٹ بالر خرم شہزاد کی جگہ ویسٹ انڈیز کے خلاف پلیئنگ الیون میں شامل کیا گیا ہے۔
