لاہور: پنجاب اسمبلی کا اجلاس حکومتی ارکان کی عدم دلچسپی کے باعث ڈیڑھ گھنٹہ بھی نہ چل سکا اور اسپیکر کو ایجنڈا مکمل کئے بغیر اجلاس ملتوی کرنا پڑا۔
اسپیکر رانا محمد اقبال کی زیرصدارت پنجاب اسمبلی کا اجلاس 45 منٹ تاخیر سے شروع ہوا تو اس وقت ایوان میں صرف 7 ارکان موجود تھے۔
محکمہ ہائر ایجوکیشن سے متعلق تحریری سوالات کے جوابات دیئے گئے۔ سرکاری کارروائی میں جب اسپیکر نے گنے کے کاشتکاروں کے مسائل پر بحث شروع کرنے کا اعلان کیا تو مسلم لیگ نون کے رکن طارق باجوہ نے کورم کی نشاندہی کر دی۔
ایوان کی کارروائی دو بار معطل کرنے کے باوجود کورم پورا نہ ہوا تو اسپیکر نے اجلاس پیر کی سہ پہر 3 بجے تک ملتوی کردیا۔ جس پر اپوزیشن ارکان نے تنقید کرتے ہوئے کہا کہ حکومت کی اپنے ارکان پر بھی گرفت نہیں رہی کہ وہ اپوزیشن کا کام کرنا شروع ہو گئے ہیں۔
کورم کی نشاندہی کرنے والے طارق باجوہ کا کہنا تھا کہ گنے کے کاشتکاروں کا مسئلہ اہم ہے، اسے صرف چند ارکان زیر بحث نہیں لا سکتے، اس لئے اجلاس کا کورم پورا ہونا ضروری ہے، اسی لئے نشاندہی بھی کی ہے۔
