کراچی کے علاقے پی آئی بی میں ایس پی سی آئی ڈی چوہدری اسلم کے اسکواڈ پر خودکش حملے کا مقدمہ انسداد دہشتگردی کی دفعات کے تحت درج کرلیا گیا تفتیشی اداروں نے مبینہ حملہ آور نعیم اللہ کے دوبھائیوں سمیت12سےزائد مشتبہ افراد کوحراست میں لیکر تحقیقات کا آغاز کردیا ہے۔
ایف آئی آر میں تحریک طالبان پاکستان کے سربراہ مولوی فضل اللہ اور ترجمان شاہد اللہ شاہد کو مرکزی ملزم نامزد کیا گیا ہے اور یہ کسی بھی جرم میں طالبان کے خلاف درج ہونے والی پہلی ایف آئی آر ہے۔
چوہدری اسلم خان پر خودکش حملہ میں ملوث ملزمان کو کیفرکردار تک پہنچانے کیلئے پولیس اور حساس ادارے سر جوڑ کر بیٹھ گئے ہیں ہفتے کے روز بھی کئی افراد کے بیانات قلبند کئے گئے اور جائے وقوعہ پر تفتیشی ٹیموں کی آمد کا سلسلہ جاری رہا۔
پولیس حکام کے مطابق حملے میں استعمال ہونے والی پک اپ کے ٹکڑے اور دیگر واقعاتی شواہد فارنزک لیب بھیج دیئے ہیں جمعرات کے روز جائے وقوعہ سے ملنے والےانسانی اعضا میں مبینہ حملہ آور کا ہاتھ بھی موجود تھا جس کے فنگر پرنٹس کی مدد سے تفتیش میں مدد مل رہی ہے۔
تفتیشی ذرائع کے مطابق مبینہ حملہ خودکش حملہ آورنعیم اللہ اورنگی ٹاون قصبہ موڑ کا رہائشی جبکہ اس کا آبائی تعلق مہمند ایجنسی سے تھا ملزم نے افغانستان سے عسکری تربیت حاصل کی تھی دوسری جانب جائے وقوعہ کے قریب سے ملنے والی ٹیکسی کے ڈرائیور کو بھی پولیس نے شامل تفتیش کرلیا ہے۔
