کراچی: فائرنگ اور پرتشدد واقعات کے دوران 6 افرادجاں بحق جبکہ مبینہ پولیس مقابلوں میں دوملزمان ہلاک ہوئے۔
پولیس حکام کا کہنا ہے کہ لیاری کے علاقے چاکیواڑہ میں فائرنگ سے ایک شخص جاں بحق ہوا جبکہ میمن گوٹھ کے علاقے میں ملیر ندی کے قریب سے تین افراد کی لاشیں ملی ہیں جنھیں فائرنگ کرکے قتل کیا گیا تھا، لاشوں کو ضابطے کی کاروائی کیلئے جناح اسپتال منتقل کیا گیا ہے۔
جہاں تین افراد میں سے دو کی شناخت ہوگئی، مقتولین میں بائیس سالہ پرویز ولد غلام رسول اور چوبیس سالہ کالو ولد خیر محمد شامل ہیں۔
بلدیہ سپارکو روڈ کے قریب سے ایک شخص کی تشدد زدہ لاش ملی جبکہ اورنگی سیکٹر ساڑھے گیارہ میں پانی کے ٹینک سے دو سالہ بچے کی لاش ملی، ادھر سرجانی کے علاقے میں مبینہ پولیس مقابلے کے دوران ایک ملزم ہلاک ہوا، جس کے قبضے سے اسلحہ اور مسروقہ سامان برآمد ہوا ہے۔
رات گئے لیاری میں بھی رینجرز کے ساتھ فائرنگ میں تبادلے کے بعد گینگ وار سے تعلق رکھنے والا ایک ملزم ہلاک ہوا تھا جس کی لا ش کو ضابطے کی کاروائی کیلئے سول اسپتال منتقل کیا گیا۔
