یمن: حوثی باغیوں کے خلاف اتحادی فوج کی فضائی کارروائیاں جاری ہیں، اتحادی طیاروں نے باغیوں کے اسلحہ ڈپو اور ٹھکانوں کو نشانہ بنایا، اب تک کی کارروائی میں پانچ سو سے زائد باغیوں کی ہلاکت کا دعویٰ کیا گیا ہے۔
یمن میں حوثی باغیوں کے خلاف سترہویں روز بھی اتحادی افواج کی کارروائیاں جاری ہیں، اتحادی افواج نے فضائی حملوں کے بعد باغیوں کی پیش قدمی سست ہونے کا دعوی کیا ہے۔
دارالحکومت صنعا میں حوثٰی باغیوں اور مخالف قبیلے میں جھڑپیں ہوئی ہیں، عدن میں صدر منصور ہادی کی حامی فوج اور حوثیوں میں جھڑپوں میں متعدد افراد کی ہلاکت کی اطلاع ہے۔
یمن کے وسطی علاقوں پر بھی حوثی باغیوں ٹھکانوں پر بمباری کی گئی، ریڈکراس کے تین طیاروں نے امدادی اشیاء اور دوائیں یمن پہنچائیں۔
سعودی وزیرخارجہ شہزادہ سعود الفیصل نے ایران پرزوردیا ہے کہ وہ حوثی باغیوں کی حمایت ترک کردے۔ ایران نے اتحادی بمباری فوری طورپرروکنے کا مطالبہ کیا ہے۔
سعودی فوجی ترجمان کا کہنا ہے کہ امدادی سامان کی ترسیل کے لئے ریڈکراس کو محفوظ راستہ دینے کے لئے بات چیت جاری ہے۔ یمن میں جاری بحران کے باعث اب تک ایک لاکھ سے زائد افراد اپنا گھربار چھوڑ کرپڑوسی ملکوں میں امدادی کیمپوں میں رہنے پر مجبور ہوگئے ہیں۔
