یمن: حوثی باغیوں کے خلاف سعودی عرب کی زیرِ قیادت اتحادی ممالک کی فضائی کارروائیاں جاری ہیں، تازہ حملوں میں دارالحکومت صنعا میں حوثیوں کے کیمپوں کو نشانہ بنایا گیا۔
یمن میں حوثی باغیوں کی پیش قدمی روکنے کے لئے سعودی عرب کے آپریشن ڈیسائیسیواسٹارم کا سلسلہ دوسرے بھی جاری ہے، سعودی فضائیہ نے اتحادیوں کےساتھ مل کرباغیوں کےاہم ٹھکانوں پر بمباری کی، جس میں متعدد باغی رہنماؤں کی ہلاکت کی اطلاع ہے۔
یمن کے وزیرِخارجہ ریاض یاسین کا کہنا ہے کہ حوثی باغیوں کی جارحیت ختم ہوتے ہی فضائی حملے روک دئیے جائیں گے، جارحیت روکنے کے لئے پڑوسی ملکوں کی مدد لینا پڑی، زمینی کارروائی کے بارے میں ابھی کچھ نہیں کہا جا سکتا۔
دوسری جانب حوثی قبائلیوں کے رہنماء نے سعودی حملوں کو جارحیت قرار دیا ہے، سعودی عرب اور اس کے اتحادی ممالک نے بدھ اور جمعرات کی درمیانی شب یمن میں حوثی باغیوں کے خلاف فضائی کارروائی شروع کی تھی۔
سعودی عرب کا کہنا ہے کہ یمن میں حوثی باغیوں کے خلاف فضائی حملے جاری رہیں گے تاہم زمینی فوج بھیجنے کا ارادہ نہیں، حوثی باغیوں کی عدن کی جانب پیش قدمی کے بعد فرار ہونے والے یمنی صدر منصور ہادی ریاض پہنچ گئے ہیں۔
