The news is by your side.

Advertisement

کار چوری کی واردات اندوہناک حادثے میں تبدیل، کمسن بچے کی موت

امریکا میں کار چوری کی ایک واردات اس وقت اندوہناک صورت اختیار کر گئی جب کار چور نے گاڑی بھگا لے جانے کی کوشش میں 1 سالہ بچے کو زور دار ٹکر مار دی، معصوم بچہ موقع پر ہی ہلاک ہوگیا۔

مذکورہ واقعہ امریکی ریاست ٹیکسس میں ایک اسپتال کی پارکنگ لاٹ میں پیش آیا جہاں ایک خاتون اپنے 1 سالہ بچے کو ساتھ لے کر اس کے والد سے ملوانے کے لیے لائی تھیں۔ اس دوران کار چور ایک جانب سے نمودار ہوا اور تیزی سے خاتون کی گاڑی میں بیٹھ گیا۔

بچے کے والد نے فوری طور پر چور کو روکنے کی کوشش کی، اس سے بچنے کے لیے چور نے گاڑی ریورس کی تو پیچھے کھڑی خاتون اور اس کا بچہ گاڑی کی زد میں آگئے۔

ملزم

کھینچا تانی میں چور نے گاڑی کو آگے لے جاتے ہوئے گاڑی بھگانے کی کوشش کی تو ایک بار پھر ماں اور بیٹے کو ٹکر مار دی، زور دار ٹکر سے بچہ ماں کی گود سے زمین پر گر گیا۔

دونوں کو فوری طور پر اسپتال لے جایا گیا تاہم تب تک بچے کی موت ہوچکی تھی، ماں بری طرح زخمی ہوئی البتہ اس کی حالت خطرے سے باہر تھی۔

پولیس کا کہنا ہے کہ چور اس وقت گاڑی لے کر فرار ہوگیا تاہم تھوڑی دور بعد اس نے ایک درخت سے گاڑی دے ماری جس کے بعد مجبوراً اسے گاڑی چھوڑ کر فرار ہونا پڑا، تھوڑی دیر میں ہی وہ پولیس کے ہتھے چڑھ گیا۔

پولیس کے مطابق مذکورہ شخص کی عمر 30 سال کے لگ بھگ ہے اور اس پر قتل اور ڈکیتی کا الزام عائد کیا گیا ہے۔

Comments

یہ بھی پڑھیں