اسلام آباد: تحریک انصاف کے چیئرمین عمران خان نے دعویٰ کیا ہے کہ پاناما لیکس پر زبان بند رکھنے کے لیے 10 ارب روپے کی پیش کش کی گئی مگر اُسے ٹھکرا دیا۔
تقریب سے خطاب کرتے ہوئے عمران خان نے دعویٰ کیا کہ پاناما کیس پر خاموش رہنے کے لیے 10 ارب روپے کی پیشکش کی گئی، اہم شخصیات نے رابطہ کر کے کہا رقم لو اور معاملے پر خاموشی اختیار کرلو۔
انہوں نے کہا کہ پاناما کی تحقیقات کرنے والے ادارے نوازشریف کے ماتحت ہیں، اگر اداروں پر دباؤ نہ ڈالا تو نوازشریف اپنا عہدہ استعمال کرتے ہوئے اُن پر اثر انداز ہوسکتے ہیں۔
عمران خان نے خدشہ ظاہر کیا کہ جب مجھے اربوں کی پیش کش کی جاسکتی ہے تو باقی اداروں کو خریدنے کے لیے حکومت کیا نہیں کرسکتی تاہم تحریک انصاف اس معاملے پر خاموش نہیں بیٹھے گی اور ہم اپنی آواز اٹھاتے رہیں گے۔
یاد رہے پاناما معاملے کی تحقیقات کے لیے سپریم کورٹ نے جے آئی ٹی تشکیل دینے کے احکامات جاری کیے ہیں، اپوزیشن جماعتوں نے سپریم کورٹ کے فیصلے کے بعد نوازشریف سے مستعفیٰ ہونے کا مطالبہ کیا ہے۔
