راولپنڈی: سکیورٹی فورسز نے صوبہ خیبر پختونخوا کے مختلف علاقوں میں اہم کارروائیاں کرتے ہوئے 10 خارجی دہشتگردوں کو ہلاک کر دیا۔
فوج کے شعبہ تعلقات عامہ (آئی ایس پی آر) کے مطابق ڈی آئی خان کے علاقے کلاچی میں انٹیلی جنس بیسڈآپریشن کے دوران 4 خارجی دہشتگرد مارے گئے جبکہ شمالی وزیرستان میں 4 کارروائیاں میں 6 خوارج ہلاک ہوئے۔
آئی ایس پی آر نے بتایا کہ دتہ خیل، حسن خیل، غلام خان اور میر علی میں بھی کارروائیاں کی گئیں، مختلف کارروائیوں کے دوران مختلف ہتھیار اور گولیاں برآمد کی گئیں۔
یہ بھی پڑھیں: میر علی میں شہید ہونے والے میجر حمزہ اسرار کی نمازِ اجنازہ ادا
ہلاک خارجی دہشتگرد سکیورٹی فورسز پر حملوں اور بے گناہ شہریوں کے قتل میں ملوث تھے۔ ممکنہ خوارج کے خاتمے کیلیے کلیئرنس آپریشنز کیے گئے۔
گزشتہ روز سکیورٹی فورسز کے شمالی وزیرستان میں آپریشن کے دوران میجر اور سپاہی شہید ہوئے تھے جبکہ جوابی کارروائی میں 6 خارجی دہشتگرد مارے گئے تھے۔
سکیورٹی فورسز کے آپریشن کے دوران 6 خوارج ہلاک ہوئے جبکہ میجر حمزہ اسرار اور سپاہی محمد نعیم بہادری سے لڑے ہوئے شہید ہوگئے تھے۔
شہید میجر حمزہ اسرار کی عمر29 سال اور تعلق راولپنڈی سے تھا اور شہید سپاہی محمد نعیم کی عمر 26 سال اور تعلق نصیر آباد سے تھا، شہید میجرحمزہ اسرار اپنے دستوں کی قیادت کر رہے تھے انہوں نے 9 سال تک دفاع وطن کا فریضہ سرانجام دیا اور ان کی حال ہی میں شادی ہوئی تھی۔
