اسلام آباد: وزیراعظم عمران خان کے کیخلاف بیانات پر پاکستان ہاکی فیڈریشن نے سابق ہاکی پلیئر رشیدالحسن پرپابندی عائد کردی ہے۔
اے آر وائی نیوز کے مطابق سابق اولمپیئن نے وزیراعظم عمران خان کے بارے میں توہین آمیز بیانات دئیے تھے، جس پر پاکستان ہاکی فیڈریشن نے ہاکی لیجنڈ رشید الحسن پر دس سال کی پابندی عائد کی ہے۔
پاکستان ہاکی فیڈریشن کے سیکریٹری آصف باجوہ نے پابندی کی تصدیق کردی ہے، آصف باجوہ نے بتایا کہ حکومت پاکستان کی ہدایات پر پابندی عائد کی گئی ہے، سابق اولمپئن رشید الحسن نے پی ایچ ایف کے بھجوائے گئے شوکاز کا جواب نہیں دیا تھا۔
سیکریٹری پاکستان ہاکی فیڈریشن نے مزید کہا کہ رشید الحسن کے ریمارکس کا حکومت کی جانب سے سخت نوٹس لیا گیا تھا۔
ادھر پی ایچ ایف نے پیمراسے بھی رابطہ کیا ہے اور پابندی کا شکار سابق اولمپیئن کی کسی بھی پروگرام میں شرکت پر پابندی کا مطالبہ کیا ہے۔
