کیرالہ: انسانی جانوں کو خطروں سے بچانے والے فائر فائٹرز ایسے کارنامے سر انجام دیتے ہیں جو بہت کم ہی میڈیا کے زینت بنتے ہیں، مگر مشکل وقت میں ان کے کئے گئے فیصلے تادیر عمر یاد رکھے جاتے ہیں۔
ایسا ہی واقعہ بھارتی ریاست کیرالہ میں وقوع پزیر ہوا،جہاں فائر فائٹرز نے پچاس فُٹ گہرے کنویں میں گرنے والی خاتون کوڈرامائی انداز میں بچا کر اعلیٰ مثال قائم کی۔
کیرالہ کے وائی ناڈ ضلع کے فائر ڈیپارٹمنٹ کے عہدیداروں کو کچھ مقامی لوگوں نے اطلاع دی کہ خاتون گہرے کنویں میں گرگئی ہے، نامساعد حالات کا شکار ریسکیو ٹیم نے خاتون کو بچانے کے لئے رسیاں اور دیگر اوزار استعمال کیے۔
پچاس فٹ کنویں سے خاتون کو اوزار اور رسیوں کی مدد سے ریسکیو کرنے کی ویڈیو سوشل میڈیا پر وائرل ہوگئی ہے، مختصر ویڈیو میں دیکھا جاسکتا ہے کہ رسیوں سے بنے جال کو کنویں میں ڈالا گیا اور اطراف کی رسیوں کو ریسکیو کارکنان نے اس طرح کھینچا کہ خاتون کے گرد محفوظ جال بن گیا بعد ازاں خاتون کو رسیوں کی مدد سے اندھے کنویں سے باہر نکالا گیا۔
اسی طرح کا ایک اور واقعہ گذشتہ سال نومبر میں تامل ناڈو کے علاقے دھرمپوری میں پیش آیا تھا، جہاں ایک ہاتھی پچاس فٹ گہرے کنویں میں گرا تھا، ہاتھی کو بھی اسی طریقہ کار کے تحت بارہ گھنٹوں کی طویل جدوجہد کے بعد ریسکیو کیا گیا تھا۔
