نئی دہلی : بھارت میں 12 سالہ بچے نے ویب سیریز سے متاثر ہوکر بلند و بالا عمارت سے چھلانگ لگاکر اپنی زندگی کا خاتمہ کرلیا۔
غیر ملکی میڈیا کے مطابق کمسن بچے کا بلند و بالا عمارت سے چھلانگ لگانے کا افسوسناک واقعہ بھارتی ریاست مغربی بنگال کے شہر کلکتہ میں پیش آیا جہاں گھر والے پوجا میں مصروف رہے اور بچے نے چھت سے چھلانگ لگا دی۔
پولیس حکام کا کہنا ہے کہ بچے کو امید تھی کہ وہ چھت سے کودے گا لیکن مرے گا نہیں کیوں کہ اسے سپرہیرو آکر بچا لے گا، لیکن ایسا کچھ نہیں ہوا اور بچہ سیدھا فرش سے جاٹکرایا۔
حادثے کے باعث بچہ خون میں ڈوبا ہوا تھا جسے فوری طور پراسپتال منتقل کیا گیا تاہم وہ موقع پر ہی دم توڑ چکا تھا۔
پولیس کا کہنا ہے کہ بچہ جاپانی ویب سیریز ‘پلاٹینیم اینڈ’ دیکھنے کا عادی تھا جس میں ایک بچہ عمارت سے کودتا ہے اور اسے سپر ہیرو بچا لیتا ہے، بھارتی بچے نے فلم میں دکھائے گئے سین کو حقیقی سمجھا اور عمارت سے چھلانگ لگا دی۔
