لاہور: صوبہ پنجاب میں سردی کے باعث نمونیہ سے بچوں کی اموات میں اضافہ ہو گیا ہے، روزانہ کی بنیاد میں اموات ہو رہی ہیں، گزشتہ چوبیس گھنٹوں کے دوران بھی مزید 13 بچے نمونیہ سے جاں بحق ہو گئے۔
تفصیلات کے مطابق محکمہ صحت پنجاب نے کہا ہے کہ صوبے میں نمونیہ سے مختلف اسپتالوں میں مزید تیرہ بچوں کی اموات ہوئی ہیں، لاہور شہر میں 24 گھنٹوں کے دوران نمونیہ سے ایک بچہ انتقال کر گیا۔
محکمہ صحت کی رپورٹ کے مطابق پنجاب میں 24 گھنٹوں کے دوران نمونیہ کے 1045 نئے کیسز رپورٹ ہوئے، جب کہ صرف لاہور شہر میں رپورٹ ہونے والے نئے کیسز کی تعداد 248 ہے۔
پنجاب میں رواں سال کے پہلے مہینے (جنوری) میں نمونیہ سے 288 اموات ہو چکی ہیں، اور 17 ہزار 248 کیسز سامنے آئے، لاہور میں رواں ماہ نمونیہ سے 57 اموات اور 3 ہزار 151 کیسز رپورٹ ہوئے۔
کھانسی کے شربت سے متعلق خطرناک انکشاف ، ہرگز استعمال نہ کریں
محکمہ صحت پنجاب نے ہدایت جاری کی ہے کہ والدین اپنے بچوں کو سردی سے بچائیں، اور حفاظتی ٹیکوں کا کورس لازمی مکمل کروایا جائے۔
