امریکا نے چوری ہونے والے 13 ملین ڈالر سے زائد مالیت کے قدیم گندھارا تہذیب کے 133 نوادرات پاکستان کو واپس کر دیے۔
غیر ملکی میڈیا کے مطابق امریکا نے13 ملین ڈالر سے زائد مالیت کے چوری شدہ 133 قدیم نوادرات پاکستان کو واپس کر دیے ہیں۔ اس حوالے سے نیویارک میں مین ہٹن ڈسٹرکٹ اٹارنی کے دفتر میں گزشتہ روز تقریب منعقد ہوئی جس میں برآمد شدہ بعض نوادرات کی نمائش بھی کی گئی۔
رپورٹ کے مطابق تقریب میں نیویارک میں پاکستانی قونصل جنرل عامر احمد اتوزئی نے حکومت پاکستان کی جانب سے نوادرات وصول کیے۔ اس موقع پر قونصل جنرل نے میں ہٹن میں اسسٹنٹ ڈسٹرکٹ اٹارنی اور نوادرات اسمگلنگ یونٹ کے سربراہ میتھیو بوگڈانوس کے ساتھ ایک معاہدے پر دستخط بھی کیے۔
قونصل جنرل نے ڈسٹرکٹ اٹارنی دفتر، اس کے نوادرات کے اسمگلنگ یونٹ اور محکمہ ہوم لینڈ سیکیورٹی کا پاکستان کے چوری شدہ ثقافتی خزانے کی برآمد کی کوششوں پر ان کا شکریہ ادا کیا اور کہا کہ اب یہ نوادرات پاکستان بھر کے عجائب گھروں کی زینت بنیں گے۔
بوگڈانوس نے کہا کہ وہ پاکستان کو عظیم پاکستانی ورثے کے نمونے واپس کرنے پر بہت خوش ہیں، جن کی تہذیب 5000 سال پرانی ہے۔
واضح رہے کہ یہ نوادرات غیر قانونی منتقلی کے دوران امریکی ہوم لینڈ سیکیورٹی نے قبضے میں لیے تھے۔
