بھارتی ریاست آسام میں ایک خونخوار چیتا ریسرچ انسٹی ٹیوٹ کیمپس میں گھس گیا اور 15 افراد کو زخمی کردیا اس کی گاڑی پر حملے کی ویڈیو وائرل ہوگئی۔
غیر ملکی میڈیا رپورٹ کے مطابق یہ واقعہ رواں ہفتے پیر کے روز پیش آیا جب آسام کے جورہاٹ ضلع میں رین فارسٹ ریسرچ انسٹی ٹیوٹ کیمپس ایک چیتا اچانک گھس گیا اور وہاں موجود لوگوں پر حملہ کردیا جس کے نتیجے میں 15 افراد زخمی ہوگئے جن میں محکمہ جنگلات کے تین اہلکاروں سمیت خواتین اور بچے شامل تھے۔
محکمہ جنگلات کے اہلکار نے بتایا کہ واقعے سے پہلے چیتا صبح سے ہی ضلع کے چنیجان علاقے میں کیمپس کے گرد گھوم رہا تھا۔ جس پر کیمپس کے رہائشیوں نے محکمہ جنگلات کو اطلاع دی اور وہاں سے ایک ٹیم اسے پکڑنے کے لیے جائے وقوعہ پر پہنچی تھی۔
اہلکار کے مطابق پکڑنے والی ٹیم کو دیکھ کر چیتے نے وہاں سے فرار ہونے کی کوشش کی اور اسی دوران وہ وہاں موجود لوگوں پر حملہ آور ہوا جس کے نتیجے میں 15 افراد زخمی ہوئے۔
خود کو پکڑنے کی کارروائی کے دوران چیتے نے خونخوار انداز میں ایک وین پر بھی حملہ کیا تاہم خوش قسمتی سے وین کے دروازے اور شیشے بند تھے جس کے باعث لوگ محفوظ رہے۔
Leopard Runs Loose in Assam's #Jorhat, Jumps on Passenger Vehicle Injuring Several People including Forest Staff#VIRAL #viralvideo #Leopard #assam pic.twitter.com/zSYpL0gEkX
— India.com (@indiacom) December 27, 2022
تاہم محکمہ جنگلات کے عملے نے بڑی کوششوں کے بعد بالآخر چیتے کو پکڑ ہی لیا اور اسے منتقل کردیا جب کہ زخمیوں کو اسپتال میں داخل کرایا گیا ہے جہاں ان کی حالت بہتر بتائی جاتی ہے۔
اس حوالے سے محکمہ جنگلات کے افسر رنجیت کور کا کہنا ہے کہ چیتا اکثر اپنا مقام تبدیل کرتا تھا۔ گزشتہ روز یہ بھٹک کر چائے کے باغات سے گھرے پڑوسی گاؤں میں داخل ہوا اور کئی مقامی لوگوں کو حملہ کرکے زخمی کردیا۔
