بیجنگ : چین کے ایک ریستوران میں آتشزدگی سے کم از کم 17 افراد ہلاک ہوگئے، واقعے میں تین افراد کے زخمی ہونے کی بھی اطلاعات ہیں۔
غیر ملکی خبر رساں ادارے کی رپورٹ کے مطابق یہ اندوہناک واقعہ چین کے صوبے جیلن کے شہر چانگ چون میں پیش آیا، اس شہر کے مقامی ریستوران میں آگ لگنے کے باعث 17 افراد ہلاک اور 3 زخمی ہوگئے۔
ریسٹورنٹ میں آگ لگنے کی تفصیلی وجہ ابھی معلوم نہیں ہوسکی تاہم حکام کا کہنا ہے کہ اس حوالے سے واقعے کی دیگر زاویوں سے تحقیقات کی جارہی ہیں۔
غیر ملکی خبر رساں ادارے کی رپورٹ کے مطابق ریستوران میں آتشزدگی کی اطلاع ملتے ہی امدادی کارکنان جائے وقوعہ پر پہنچ گئے تاہم دو گھنٹے کی مسلسل محنت کے بعد فائر بریگیڈ کے عملے نے آگ پر قابو پالیا۔
رپورٹ میں مزید کہا گیا ہے حادثے میں تمام ہلاک اور زخمی افراد کو قریبی اسپتال منتقل کردیا گیا ہے، ایک زخمی کی حالت تشویش ناک بتائی جارہی ہے۔
یاد رہے کہ چین میں ایک ماہ کے دوران یہ آتشزدگی کا دوسرا بڑا واقعہ رونما ہوا ہے جب کہ اس سے قبل 16 سمتبر کو 42 منزلہ عمارت میں آگ بھڑک اٹھی تھی تاہم خوش قسمتی سے کسی جانی نقصان کی اطلاع نہیں ملی تھی۔
