تہران: ایران کے دارالحکومت میں پہلا روبوٹک ریسٹورنٹ کھل گیا جہاں کوئی بھی صارف ٹیبل پر بیٹھے بیٹھے کھانے کا آرڈر دے سکے گا اور آرڈر اُس کے پاس خود بہ خود پہنچ جائے گا۔
تفصیلات کے مطابق تہران میں کھلنے والے اس ریسٹورنٹ کو ’روبوٹ کک‘ کا نام دیا گیا ہے جہاں گاہگوں کو ایسی سہولت فراہم کی گئی ہے کہ وہ ٹیبل پر بیٹھے بیٹھے اپنا کھانے کا آرڈر دے سکیں گے۔
پیزا ریسٹورنٹ میں داخل ہونے والا صارف جب بیٹھے گا تو اُس کے سامنے رکھی ٹیبل پر ڈیجیٹل مینیو بنا ہوا آجائے گا جس کے بعد وہ اپنا آرڈر بک کروائے گا اور یہ کچن میں لگی اسکرین پر آویزاں ہوجائے گا۔
شیف اسکرین پر نظر آنے والے آرڈر کو تیار کرے کے اُسے لفٹ میں رکھ دے گا اور پھر کھانا خود بہ خود متعلقہ ٹیبل تک پہنچ جائے گا۔
انتظامیہ کی جانب سے گاہگوں کی بوریت دور کرنے کے لیے ڈیجیٹل ٹیبل پر کچھ گیمز بھی موجود ہیں جنہیں کھیل کر انتظار کو مزے میں تبدیل کیا جاسکے گا۔
منتظمین کا کہنا ہے کہ اُن کو اس ریسٹورنٹ کا خیال اُس وقت آیا جب انہوں نے روبوٹ ویٹرز کو ہوٹل میں کام کرتے دیکھا، منفرد ہوٹل عوام کی توجہ کا مرکز بن گیا ہے کیونکہ یہاں گاہگوں کو انتظار نہیں کرنا پڑتا۔
