کراچی : نجی ایئر لائنز کی دو پروازیں اچانک فنی خرابی کے باعث اڑان کے فوری بعد بحفاظت ایئرپورٹ اتارلی گئیں۔
تفصیلات کے مطابق کراچی سے جدہ جانے والی نجی ایئرلائن میں فنی خرابی ہوئی ، خرابی کےباعث طیارے کی کراچی ایئرپورٹ پر ٹیکنیکل لینڈنگ کرائی گئی۔
طیارے کے اڑان بھرنے کے بعد فنی خرابی پیدا ہوئی ، جس کے بعد کپتان نے کنٹرول ٹاور سے رابطہ کرکے طیارے کو بحفاظت اتارلیا، کراچی طیارے میں 200 سے زائد عمرہ زائرین سوار تھے۔
انتظامیہ نے کہا کہ فنی خرابی دور ہوتے ہی پرواز کو روانہ کردیا جائے گا۔
دوسری جانب لاہور سے کویت جانے والی نجی ایئرلائن کی پرواز میں اچانک فنی خرابی ہوئی ، جس کے بعد پرواز نے لاہور ایئرپورٹ پر ہنگامی لینڈنگ کی۔
پرواز کےاڑان بھرنے کےکچھ وقت بعداچانک فنی خرابی پیدا ہوئی، کپتان کا کنٹرول ٹاور سے رابطہ، دوبارہ لینڈنگ کی اجازت طلب کی اور طیارے کو باحفاظت لاہور ایئرپورٹ پر اتارلیا گیا۔
ایئرپورٹ ذرائع نے بتایا کہ فنی خرابی کے باعث طیارے کو گراؤنڈ کرنے احکامات جاری کردیئے گئے ہیں اور تمام مسافروں کو ہوٹل منتقل کیاجارہا ہے۔
