پشاور : خیبرپختونخوا میں دہشت گردوں کے دو حملوں کو ناکام بنا دیا گیا اور پولیس کی بروقت کارروائی سے دہشت گرد فرار ہوگئے۔
تفصیلات کے مطابق خیبرپختونخوا میں دہشت گردوں کے حملوں کو ناکام بنا دیا گیا، خیبر جمرود بائی پاس چیک پوسٹ پر شدت پسندوں نے حملہ کیا تاہم کا سیکیورٹی فورسز کی مؤثرکارروائی پر حملہ آور زخمی حالت میں فرار ہوگئے۔
دہشت گردوں سے فائرنگ کے تبادلے میں دو سپاہی زخمی ہوئے، جنھیں اسپتال منتقل کر دیا ہے اور علاقے میں سرچ آپریشن جاری ہے۔
دوسری جانب لکی مروت میں تھانہ گمبیلا پر دہشت گردوں کا حملہ ناکام بنایا گیا، ڈی پی او لکی مروت نے بتایا پولیس کی جوابی فائرنگ پر دہشت گرد فرار ہوگئے تاہم کوئی جانی نقصان نہیں ہوا۔
مزید پڑھیں : کرک/ پشاور : دو تھانوں، چیک پوسٹ اور سوئی گیس آفس پر حملے، دو اہلکار شہید
گذشتہ روز خیبر پختونخوا کے ضلع کرک اور پشاور میں رات گئے دو پولیس اسٹیشن، چیک پوسٹ اور سوئی گیس دفتر پر دہشت گردوں نے حملہ کیا تھا، حملے میں سیکیورٹی گارڈ اور سب انسپکٹر جان کی بازی ہار گئے تھے۔
خیال رہے گذشتہ روز بلوچستان میں نوشکی دالبندین شاہراہ پر ایف سی کے قافلے پر کالعدم بی ایل اے کے خودکش حملے میں 3 ایف سی اہلکاروں سمیت 6 افراد شہید اور متعدد زخمی ہوگئے تھے۔
