ریاض: سعودی عرب میں 11 ملین ریال کا فراڈ کرنے والے 2 افراد کو 28 برس قید اور 1 کروڑ ریال جرمانے کی سزا سنائی گئی ہے۔
اردو نیوز کے مطابق سعودی پبلک پراسیکیوشن کا کہنا ہے کہ دھوکا دہی سے رقم ہتھیانے والے 2 افراد کو 28 برس قید اور ایک کروڑ ریال جرمانے کی سزا سنائی گئی ہے۔
پبلک پراسیکیوشن کے عہدیدار کا کہنا ہے کہ مالی دھوکہ دہی کی رپورٹ ملنے پر سعودی شہری اور مقیم غیر ملکی سے پوچھ گچھ کی گئی۔
ملزمان سعودی عرب کے باہر ایک گروہ کے ساتھ ساز باز کیے ہوئے تھے اور ٹیکنالوجی اور کمپیوٹر پروگرامنگ کے ذریعے آن لائن وارداتیں کر رہے تھے۔
ملزمان مالیاتی دھوکہ دہی کے ذریعے 11 ملین ریال سے زیادہ کی رقم ہتھیا چکے تھے۔
پنلک پراسیکیوشن کے عہدیدار کا کہنا تھا کہ دونوں ملزمان کو پوچھ گچھ کے بعد اسپیشل کورٹ کے حوالے کردیا گیا۔
عدالت نے الزام ثابت ہوجانے پر دونوں کو 14، 14 سال قید اور 5، 5 ملین ریال جرمانے کی سزا سنائی، دھوکہ دہی میں استعمال ہونے والی ڈیوائسز بھی ضبط کرنے کا حکم دیا گیا۔
پبلک پراسیکیوشن کا کہنا ہے کہ مالیاتی دھوکہ دہی کے جرائم کو روکنے کے سلسلے میں پرعزم ہیں، کسی بھی شخص کے ساتھ کوئی رعایت نہیں ہوگی۔
