کراچی: پاکستان کی عورت کسی سےکم نہیں،شہر قائد کی جمیلہ خاتون نے ثابت کردیا۔
کراچی کے علاقے رنچھوڑ لائن کی رہائشی جمیلہ خاتون کے شوہر کا پینتیس سال قبل انتقال ہوا، تاہم جمیلہ خاتون نے اپنے اہل خانہ کی کفالت کے لیے ہمت نہ ہاری اور چھوٹے سے کیبن پر جوانی میں کاروں اور موٹر سائیکلوں کے آئل تبدیل کرنے کاکام شروع کیا لیکن اب وہ عمر کے اس حصے میں ہیں کہ وہ صرف موٹرسائیکلوں کا ہی آئل تبدیل کرتی ہے۔
جمیلہ بی بی نے اے آر وائی نیوز سے خصوصی گفتگو میں بتایا کہ لوگوں نے میرے کام کرنے پر تنقید کا نشانہ بنایا لیکن میں نے پیچھے مڑکر نہیں دیکھا، اہل خانہ کے ساتھ ساتھ اپنے مرحوم بیٹے کے بچوں کی بھی کفالت کرتی ہیں اور ان کو پڑھاتی ہیں۔
جمیلہ بی بی کے پوتے نے شریک گفتگو ہوئے اور بتایا کہ میں اپنی دادی کو بچپن سے کام کرتے دیکھ رہا ہوں، اپنی تعلیم کے بعد ان کا ہاتھ بٹاتا ہوں، بزرگ خاتون سے کام کرانے والے افراد کا کہنا ہے کہ ہم عرصہ دراز سے ان سے ہی آئل تبدیل کراتے ہیں وجہ یہ ہے کہ ان کے ریٹ مناسب ہیں۔
عزم وہمت کا پیکر جمیلہ خاتون نے وزیراعظم عمران خان، وزیر اعلی سندھ سید مراد علی شاہ سے اپیل کی ہے کہ انہیں ایک چھوٹی سی ایک دکان بنا کر دے جائے تاکہ وہ اپنا کام جاری رکھ سکے۔
