ہفتہ, مئی 25, 2024
اشتہار

زمان پارک جانیوالی پولیس ٹیم پر حملے کے 3 مقدمات درج

اشتہار

حیرت انگیز

عمران خان کی رہائشگاہ زمان پارک جانے والی پولیس ٹیم پر حملے کے تین مقدمات پاکستان تحریک انصاف کے کارکنان کے خلاف درج کرلیے گئے ہیں۔

اے آر وائی نیوز کے مطابق عمران خان کی رہائشگاہ زمان پارک لاہور جانے والی پولیس ٹیم پر حملے کے تین مقدمات پی ٹی آئی کارکنوں کے خلاف درج کرلیے گئے ہیں۔

انسپکٹر ذوالفقارعلی کی مدعیت میں تھانہ ریس کورس میں دو مقدمات درج کیے گئے جن میں دہشتگردی، ناجائز اسلحہ، اقدام قتل سمیت سنگین دفعات شامل کی گئی ہیں۔

- Advertisement -

مقدمے کے متن کے مطابق پی ٹی آئی کارکنوں کے پتھراؤ سے ڈی ایس پی سمیت 13 پولیس اہلکار زخمی ہوئے۔ مقدمے میں 102 ملزمان کو نامزد کیا گیا اور 76 کو گرفتار کیا گیا ہے۔

ایف آئی آر کے مطابق پی ٹی آئی کے کارکنوں سے 8 رائفلیں، سیکڑوں گولیاں اور پیٹرول بم برآمد کیے گئے۔ پی ٹی آئی کی سینیئر قیادت نےعلاقہ غیر سے مشکوک مسلح افراد بلوا رکھے تھے۔

پی ٹی آئی کارکنان کے خلاف تیسرامقدمہ بھی تھانہ ریس کورس میں درج کیا گیا۔ ایلیٹ فورس کی گاڑی کی توڑ پھوڑ کا مقدمہ 150 نامعلوم افراد کے خلاف درج کیا گیا۔

ایف آئی آر کے مطابق ایلیٹ فورس کے اہلکار پٹرولنگ کیلیے جا رہے تھے کینال روڈ پر 150 نامعلوم افراد نے گاڑی روکی۔ 150 نامعلوم پی ٹی آئی کارکنوں نے ڈنڈوں کے ساتھ ایلیٹ کی گاڑی پر حملہ کیا۔ یہ حملہ پی ٹی آئی کی سینیئر قیادت کی ایما پر کیا گیا۔

کارکنوں نے اہلکار سے رائفل، 3 بلٹ پروف جیکٹس، پلاسٹک ہیلمٹ اور موبائل فون بھی چھینا۔

Comments

اہم ترین

ویب ڈیسک
ویب ڈیسک
اے آر وائی نیوز کی ڈیجیٹل ڈیسک کی جانب سے شائع کی گئی خبریں

مزید خبریں