اسلام آباد: عمران خان کی اسلام آباد کی عدالتوں میں پیشی سے متعلق درخواست پر اسلام آباد ہائیکورٹ کے رجسٹرار آفس نے 3 اعتراضات عائد کر دیے۔
تفصیلات کے مطابق عمران خان نے فیصل چوہدری ایڈووکیٹ کے ذریعے اسلام آباد ہائی کورٹ میں عدالتوں میں ویڈیو لنک کے ذریعے پیشی اور سیکیورٹی کے لیے درخواست دائر کی تھی، جس پر تین اعتراضات کیے گئے ہیں۔
اسلام آباد ہائیکورٹ رجسٹرار آفس کا پہلا اعتراض تھا کہ عمران خان کی درخواست واضح نہیں ہے، دوسرا اعتراض تھا کہ ویڈیو لنک کی درخواست اسلام آباد ہائیکورٹ میں کیسے دائر ہو سکتی ہے؟ اور تیسرا یہ اعتراض کیا گیا کہ متعلقہ عدالت سے رجوع کیے بغیر کیسے درخواست قابل سماعت ہو؟
درخواست میں عدالت سے استدعا کی گئی تھی کہ عمران خان کو عدالتوں میں پیشی کے دوران سیکیورٹی تھریٹس ہیں، اس لیے انھیں پیشی کے لیے سخت سیکیورٹی فراہم کی جائے، اور اسلام آباد کے تمام کیسز میں ویڈیو لنک پر پیشی کی اجازت دی جائے۔
درخواست میں کہا گیا تھا کہ سیکیورٹی وجوہ پر ذاتی پیشی سے عدالتی کارروائیاں بھی تعطل کا شکار ہوتی ہیں، اس لیے اسلام آباد ہائیکورٹ کی تمام ماتحت عدالتوں میں ویڈیو لنک پر پیشی کی استدعا کی جاتی ہے۔
عمران خان کی درخواست میں تمام کیسز جوڈیشل کمپلیکس میں چلانے کی بھی تجویز پیش کی گئی تھی، اور کہا گیا تھا کہ پولیس کو عدالت پیشی کے دوران سیکیورٹی فراہم کرنے کا حکم دیا جائے، اس کے علاوہ موٹر وے ہائی وے پر بھی سیکیورٹی فراہمی کے احکامات دیے جائیں۔
