بچے سمیت 4 افراد تالاب میں ڈوب کر زندگی سے ہاتھ دھو بیٹھے بچے کو ڈوبتا دیکھ کر تینوں اس کو بچانے کے لیے تالاب میں کودے تھے۔
یہ افسوسناک واقعہ راولپنڈی کے تھانہ ٹیکسلا کی حدود میں پیش آیا جہاں مچھلیاں پکڑنے اور نہانے کے لیے آنے والے بچے سمیت چار افراد ڈوب کر جاں بحق ہو گئے۔
عینی شاہدین کے مطابق مچھلیاں پکڑنے کے دوران ایک بچہ ڈوبا، جس کو بچانے کے لیے تینوں افراد نے تالاب میں چھلانگ لگا دی۔ تاہم بچے کو بچانے کی کوشش میں وہ بھی زندگی کی بازی ہار گئے۔
مقامی افراد نے تمام لاشیں تالاب سے نکال لیں اور اسپتال منتقل کر دیں جہاں سے معمول کی کارروائی کے بعد لاشوں کو ورثا کے حوالے کر دیا گیا۔
ایس ایچ او ٹیکسلا کے مطابق چاروں افراد نہانے اور مچھلی کا شکار کرنے کے لیے تالاب آئے تھے۔
مرنے والوں میں 12 سالہ وقاص، 40 سالہ امجد، 55 سالہ خالق اور اظہار شامل ہیں۔
