راولپنڈی: پاک افغان بارڈر پر ایک بار پھر سرحد پار سے دہشت گردوں کی فائرنگ کے نتیجے میں 3جوان بہادری سے لڑتے ہوئے شہید ہوگئے۔
تفصیلات کے مطابق پاکستانی فوج کے تعلقات عامہ آئی ایس پی آر کی جانب سے بیان میں کہا گیا ہے کہ پاک افغان بارڈر پر سرحدپار سے دہشت گردوں نے فائرنگ کی ، فائرنگ کاواقعہ شمالی وزیرستان دیواگرمیں پیش آیا۔
آئی ایس پی آر نے بتایا کہ دہشت گردوں کیجانب سےپاک فوج کےجوانوں کونشانہ بنایاگیا تاہم پاک فوج کے جوانوں نے دہشت گردوں کی فائرنگ پربھرپورجوابی کارروائی کی ، جس میں دہشت گردوں کوبھاری جانی نقصان پہنچنےکی مصدقہ اطلاعات ہیں۔
پاک فوج کے ترجمان کا کہنا تھا کہ دہشت گردوں سے فائرنگ کے تبادلے میں 3 جوان بہادری سے لڑتے ہوئے شہید ہوگئے۔
آئی ایس پی آر نے کہا کہ پاک فوج دہشت گردی کے خاتمے کے لیے پرعزم ہے اور بہادرجوانوں کی قربانیاں ہمارے عزم کو مزید مضبوط کرتی ہیں۔
یاد رہے رواں سال فروری میں پاک افغان بارڈر پر دہشت گردوں نے فائرنگ کر کے سکیورٹی فورسز کے پانچ جوانوں کو شہید کردیا تھا۔
