روس کا یوکرین میں ٹرین پر راکٹوں سے حملہ، 39 افراد ہلاک

کیف: مشرقی یوکرین میں روس نے چلتی ٹرین پر راکٹوں سے حملہ کردیا جس کے نتیجے میں 39 افراد ہلاک ہوگئے۔

غیرملکی خبررساں ادارے کی رپورٹ کے مطابق مشرقی یوکرین کے شہر کرامارسک میں چلتی ٹرین پر روسی راکٹ حملے میں 39 افراد ہلاک اور 100 سے زائد زخمی ہوگئے۔

یوکرینی ریلوے حکام کا کہنا ہے کہ شہری ٹرین کے ذریعے ملک کے محفوظ حصوں کی طرف نکلنے کی کوشش کررہے تھے کہ روسی فوج نے راکٹوں سے نشانہ بنایا۔

ریلوے حکام کا کہنا ہے کہ روسی راکٹ حملے میں ہلاکتوں میں اضافے کا خدشہ ہے۔

یوکرین کے حکام کا کہنا ہے کہ مشرقی یوکرین کے اسی علاقے میں روسی طیاروں نے گزشتہ روز ریلوے لائن پربمباری کی تھی جس کے بعد محفوظ علاقوں کی جانب نقل مکانی کی کوشش کرنے والے ہزاروں پناہ گزینوں سے بھری 3 ٹرینوں کوروک لیا گیا تھا۔

واضح رہے کہ گزشتہ روز اقوام متحدہ کی جنرل اسمبلی نے روس کی انسانی حقوق کونسل کی رکنیت ختم کردی تھی۔

قرارداد کے حق میں 93 اور مخالفت میں 24 ووٹ دیے گئے جبکہ 58 ارکان نے ووٹنگ میں حصہ نہیں لیا تھا۔

رپورٹ کے مطابق ووٹنگ میں چین اور ایران نے امریکی تجویز کی مخالفت میں ووٹ دیا تھا جبکہ بھارت اور پاکستان ووٹنگ میں حصہ نہ لینے والے ممالک میں شامل تھے۔

یاد رہے کہ امریکا نے یوکرین حملے کو جواز روس کے خلاف قرارداد پیش کی تھی۔

Comments