کراچی : فیڈرل بورڈ آف ریونیو (ایف بی آر ) کے 394 افسران کا سالانہ اثاثہ جات کی ڈکلیئریشن نہ کرنے کا انکشاف سامنے آیا۔
تفصیلات کے مطابق ٹیکس اکٹھا کرنے والے خود اپنے اثاثہ جات ظاہر کرنے میں ناکام ہیں، ایف بی آر کے 394 افسران کا سالانہ اثاثہ جات کی ڈکلیئریشن نہ کرنے کا انکشاف ہوا۔
ایف بی آر ہیڈکوارٹرز نے ان لینڈ ریونیو اور کسٹمزافسران کی فہرست جاری کردی ، ایف بی آر کے اثاثہ جات فراہم نہ کرنیوالے افسران کی فہرست اے آر وائی نیوز کو بھی موصول ہوگئی ہے۔
سالانہ اثاثہ جات ظاہر نہ کرنیوالوں میں ان لینڈ ریونیو اور کسٹمزافسران کو نوٹس جاری کردیا گیا ہے ، جس میں کہا ہے کہ 30 اپریل تک اثاثہ جات ظاہر نہ کرنے پر متعلقہ افسران کا پرفارمنس الاؤنس روک دیا جائے گا۔
جن افسران نے سالانہ ٓثاثہ جات ظاہر نہیں کئے ہیں ان میں ایف بی آر ان لینڈ ریونیو کے دو سو پچانوے اور کسٹمز کے ننانوے افسران شامل ہیں ، اثاثے ظاہر نہ کرنیوالے افسران ایف بی آرہیڈکوارٹر زسمیت مختلف دفاتر میں تعینات ہیں۔
