اسلام آباد: ہائیکورٹ نے پولیس کو افتخار درانی کی بازیابی کے لیے 4 دن کی مہلت دے دی۔
تفصیلات کے مطابق اسلام آباد ہائیکورٹ میں پی ٹی آئی رہنما افتخار درانی کی بازیابی کے لیے دائر درخواست پر سماعت کرتے ہوئے عدالت نے پولیس کو ان کی بازیابی کے لیے چار دن کی مہلت دے دی۔
افتخار درانی کے وکیل شیر افضل مروت نے ایس پی سی آئی اے رخسار مہدی پر اعتماد کا اظہار کیا، انھوں نے عدالت میں کہا ہمیں ایس پی رخسار مہدی پر پورا اعتماد ہے، وہ اسلام آباد پولیس کے واحد اچھی ساکھ والے افسر ہیں۔
کیس کی سماعت اسلام آباد ہائی کورٹ کے چیف جسٹس عامر فاروق نے کی، لاپتا افتخار درانی کی فیملی وکیل شیر افضل مروت کے ساتھ عدالت میں پیش ہوئی۔ جب کہ دوسرے فریق کی جانب سے ایس پی سی آئی اے انویسٹی گیشن رخسار مہدی اور وکیل پولیس طاہر کاظم عدالت میں پیش ہوئے، پولیس کے وکیل نے بتایا کہ مقدمہ درج ہو چکا ہے پولیس اپنا کام کرے گی۔
عدالت نے پولیس کو 4 دن کی مہلت دیتے ہوئے کیس کی سماعت ملتوی کر دی۔
