فلوریڈا : چار سالہ بچی ایولین گیر کی لاش گزشتہ روز فلوریڈا کے علاقے پورٹ شارلٹ میں گھر کے قریب ایک نہر کے کنارے سے ملی۔
غیر ملکی خبر رساں ادارے کی رپورٹ کے مطابق گزشتہ روز جنوب مغربی فلوریڈا سے لاپتہ ہونے والی چار سالہ بچی کی لاش آج صبح فلوریڈا کے تفریحی علاقے پورٹ شارلٹ کاؤنٹی کی نہر سے ملی ہے، جہاں اس بچی کا خاندان گزشتہ سال ستمبر میں آنے والے سمندری طوفان ایان کے باعث بےگھر ہونے کی وجہ سے ایک گھر میں رہائش پذیر تھا۔
شارلٹ کاؤنٹی شیرف کے مطابق ایولین گیئر نامی بچی کی والدہ دوپہر ایک بجے کے قریب سو کر اٹھیں تو انہیں احساس ہوا کہ ان کی چھوٹی بچی گھر میں موجود نہیں اور ان کے گھر کا مرکزی دروازہ بھی کھلا ہے جس پر انہوں نے مدد کیلئے پولیس ایمرجنسی لائن پر کال کی۔
اس حوالے سے مقامی حکام کا کہنا ہے کہ مذکورہ بچی کھیلتے ہوئے گھر سے باہر نکلی اور جمعہ کی صبح اس کے لاپتہ ہونے کی اطلاع ملی تھی۔
بعد ازاں بچی کی لاش فلوریڈا فش اینڈ وائلڈ لائف کنزرویشن کمیشن کے اہلکاروں کو ملی جو جمعے کی صبح تقریباً سوا سات بجے کشتی کے ذریعے بچی کو تلاش کر رہے تھے۔
متعلقہ حکام نے بچی کی موت کی وجوہات سے متعلق تفصیلات جاری نہیں کی ہیں تاہم جائے وقوعہ پر سراغ رساں کتوں کی مدد سے واقعے کی مزید تحقیقات کی جارہی ہیں۔
