آسٹریلیا کے شہر پرتھ میں گزشتہ 18 روز سے گمشدہ 4 سالہ بچی صحیح سلامت بازیاب کروا لی گئی، بچی کو اغوا کرنے والے 36 سالہ شخص کو گرفتار کرلیا گیا۔
آسٹریلوی حکام کے مطابق بچی اپنے والدین کے ساتھ پرتھ سے کچھ دور جنگلات میں ہائیکنگ کے لیے آئی تھی، جہاں رات کے وقت وہ اپنے ٹینٹ سے غائب ہوئی۔
بچی کی والدہ کا کہنا ہے کہ جب ان کی آنکھ کھلی تو ٹینٹ کی زپ کھلی ہوئی تھی جبکہ بچی غائب تھی۔
بچی کی گمشدگی کے بعد وسیع پیمانے پر اس کی تلاش جاری تھی، 18 روز بعد اسے قریبی علاقے میں ایک خالی مکان سے بازیاب کرلیا گیا۔ ملزم کو بھی حراست میں لے لیا گیا۔
"My name is Cleo.” pic.twitter.com/xiy59x4kjP
— WA Police Force (@WA_Police) November 4, 2021
لوگوں کا خیال تھا کہ 18 روز بعد اب بچی کے حوالے سے کوئی اندوہناک خبر سننے کو ملے گی لیکن بچی کے صحیح سلامت ملنے پر پورے ملک میں خوشی کی لہر دوڑ گئی، حتیٰ کہ اس کی تلاش پر معمور پولیس اہلکار بھی فرط جذبات سے رونے لگے۔
اس موقع پر پولیس کی جانب سے بچی کی بازیابی کی وڈیو اور ایک آڈیو بھی جاری کی گئی ہے جو سوشل میڈیا پر بے حد وائرل ہورہی ہے۔
The moment Cleo was rescued 👏 pic.twitter.com/arusYi9kCa
— WA Police Force (@WA_Police) November 3, 2021
بازیابی کے بعد بچی کے والدین سے اس کی ایک مختصر ملاقات کروائی گئی جس کے بعد اسے اسپتال لے جایا گیا جہاں تفصیلی چیک اپ کے بعد وہ اپنے گھر لوٹ سکے گی۔
بچی کے گھر والے گھر کو سجا کر بے صبری سے اس کا انتظار کر رہے ہیں۔
دوسری جانب پولیس نے ملزم پر متعدد دفعات عائد کی ہیں، پولیس کا کہنا ہے کہ اغوا بغیر کسی منصوبہ بندی کے موقع کا فائدہ اٹھا کر کیا گیا۔