جکارتہ: انڈونیشیا میں ایک افسوس ناک واقعے میں مگرمچھ خاتون سائنس دان کو نگل گیا، خاتون ریسرچ سینٹر میں کھانا دے رہی تھیں کہ اس نے حملہ کردیا۔
غیرملکی خبررساں ادارے کے مطابق میری نامی 17 فٹ لمبا مگر مچھ 44 سالہ ڈیزی ٹووو کو اس وقت گھسیٹتا ہوا انکلوژر میں لے گیا جب وہ خوراک کھلانے کے دوران گوشت پول میں ڈال رہی تھیں۔
رپورٹ کے مطابق مگرمچھ 4.5 میٹر لمبا تھا اور اس کا وزن تقریبا 600 کلو یعنی 1300 پونڈ تھا۔
حکام کے مطابق انڈونیشیا کے علاقے ششمالی سلاویسی کے ریسرچ سینٹر میں مگرمچھ کو لوگوں نے اس حالت میں دیکھا جب خاتون سائس دان کی باقیات اس کے جبڑے کے اندر موجود تھیں۔
مگرمچھ کو ہر روز تازہ چکن اور گوشت دیا جاتا تھا، اس نے ماضی میں دیگر مگرمچھوں پر بھی حملے کیے لیکن کبھی انسانوں پر حملے سے متعلق خدشات کا اظہار نہیں کیا گیا تھا۔
مزید پڑھیں: انڈونیشیا: ایک کے بدلے تین سو، مگرمچھوں پر قیامت ٹوٹ پڑی
ڈیزی ٹووو کے دوستوں کا کہنا ہے کہ وہ خاموش مزاج خاتون تھیں اور جانوروں سے انہیں بہت زیادہ لگاؤ تھا۔
واضح رہے کہ گزشتہ سال جولائی میں انڈونیشیا کے صوبے پاپوا میں ایک 45 سالہ شخص مگرمچھوں کے ایک فارم میں سبزیاں چن رہا تھا کہ اس دوران ایک مگرچھ نے اس پر حملہ کرکے اسے جان سے ماردیا تھا۔
متوفی کی تدفین کے بعد اس کے رشتے داروں نے مقامی آبادی کے ساتھ مل کر فارم پر دھاوا بول دیا، وہ چھریوں، کلہاڑیوں اور ہتھوڑوں سے لیس تھے۔
مشتعل ہجوم نے فارم ہاؤس کے دفتر میں توڑ پھوڑ کرتے ہوئے مگرمچھوں پر حملہ کر دیا، اور تین سو مگرمچھ کاٹ ڈالے، قبل ازیں فارم مالک نے لواحقین کو ہرجانے کی بھی پیش کش کی جسے نامنظور کیا گیا۔
