سکھر: صوبہ سندھ کے شہر سکھر کے نواحی علاقے صالح پٹ میں خسرے سے 10 دن میں 5 بچے جاں بحق ہو گئے۔
تفصیلات کے مطابق سکھر کے نواحی علاقے صالح پٹ کے گاؤں ورو بھنبھرو میں خسرہ وبائی صورت اختیار کر گیا ہے، خسرے میں مبتلا ہو کر پانچ بچے انتقال کر گئے، جب کہ گاؤں ورو بھنبھرو میں ابھی بھی 20 سے زائد بچے خسرے سے متاثر ہیں۔
خسرے سے بچوں کا انتقال 10 روز کے دوران ہوا ہے، جاں بحق بچوں میں 4 سالہ قاسم شباٹی، 4 سالہ ابو داؤد اور ملوکا شامل ہیں۔
ڈسٹرکٹ ہیلتھ افسر ڈاکٹر وزیر بھل اور ای پی آئی انچارج ڈاکٹر منور کے مطابق بارشوں اور ویکسین سے انکار کی وجہ سے صالح پٹ کے گاؤں ورو بھنبھرو میں خسرے کی وبا پھیلی ہے، خسرہ پھیلنے پر 20 سے زائد ٹیمیں علاقے کو روانہ کر دی گئی ہیں۔
حکام کے مطابق گاؤں ورو بھنبھرو میں لوگ بچوں کو خسروں سے بچاؤ کی ویکسین نہیں لگوا رہے ہیں، اس وقت بھی ہیلتھ کی ٹیمیں وہاں پر بچوں کو خسرے سے بچاؤ کے ٹیکے لگا رہی ہیں، اور سو سے زائد بچوں کو خسرے سے بچاؤ کی ویکسین دی گئی ہے۔