مقبوضہ کشمیر کے سری نگر میں ایک ہی خاندان کے 5 افراد کی گھر سے لاشیں برآمد ہوئی ہیں۔
غیر ملکی ذرائع ابلاغ کے مطابق مقامی حکام کا کہنا ہے کہ یہ دل دہلا دینے والا واقعہ سری نگر میں پیش آیا جہاں دم گھٹنے سے میاں بیوی اور ان کے تین بچے زندگی کی بازی ہار گئے۔
رپورٹس کے مطابق سری نگر میں کرائے کے مکان میں رہنے والے ایک خاندان کے پانچ افراد دم گھٹنے سے بے ہوش ہونے کے بعد شام دیر گئے جان کی بازی ہار گئے۔ ڈاکٹروں نے پانچوں افراد کی موت کی تصدیق کردی۔
رپورٹس کے مطابق بدقسمت خاندان کرائے کے مکان میں زندگی بسر کررہا تھا اور اصل میں وہ بارہمولہ کے رہائشی تھے، دریں اثنا، ان کی شناخت کی تصدیق نہ ہوسکی، جبکہ اس حوالے سے مزید تحقیقات کا آغاز کردیا گیا ہے۔
واضح رہے کہ سردیوں میں گیس ہیٹر اور کوئلے سے چلنے والے کھلے آلات کا استعمال کاربن مونو آکسائیڈ کے زہر کا باعث بنتا ہے جس کے نتیجے میں متعدد افراد زندگی کی بازی ہار جاتے ہیں۔
حکام نے لوگوں کو کھلے شعلے والے آلات استعمال کرتے ہوئے احتیاط برتنے کا مشورہ دیا ہے کیونکہ محکمہ موسمیات نے کشمیر کے علاقے میں آئندہ 24 گھنٹوں میں مزید برف باری کی پیشن گوئی ہے جس کے باعث سردی مزید بڑھ سکتی ہے۔
ماں کی موت کا صدمہ، بیٹے نے بھی زندگی کا خاتمہ کرلیا
حکام کا کہنا ہے کہ شمالی کشمیر کے بانڈی پورہ، بارہمولہ اور کپواڑہ اضلاع کے کئی علاقوں اور وسطی کشمیر کے بڈگام اور گاندربل اضلاع کے کچھ حصوں میں برف باری بھی ہوئی ہے۔
